لخابيط ما بعد الثلاثين

جال بخاطري كثيرا ان في شده الاحتياج الي الاخر قد تاخذنا افكارنا الي المجهول الغامض والتفكير الممتد الي مالانهايه. فهل نسقط في تلك الدوامه دوامه الانشغال في التفكير في الاخر حتي اننا في تلك الدوامه قد ننسا ما نحن بصدد البحث عنه.

كثيرا ما اعتقدت ان الانسان بامكانه ان يغير ما بداخله من معتقدات . كثيرا ما توهمت ان الانسان يملك زمام افكاره ومعتقداته. ولكن مؤخرا اكتشفت ان ما تكون من شخصيه الانسان علي مر الايام والسنين من الصعب جدا جدا تغييره في ساعات قليله او حتي ايام. أماني تلك ولكنها كانت اماني بعيده المنال . اماني بنيت علي نسيج الاحتياج انه قد يصنع المستحيل . نعم المحاوله قد تجدي نفعا ولكنك في تلك المحاولات تحتاج للاخر ان يمد اليك يديه يعينك ويشد علي يدك ليعلمك انه معك نعم نستطيع الوصول ولكن هيهات فالاخر في بداياته يحتاج الي التمهل الي التروي يحتاج الي ان يتبع عقله قبل اي شئ اخر. انه يستطيع ان يجعل عقله يتحكم في عواطفه . يستطيع ان يحول تلك المشاعر الي اشكال متعدده من العلاقات الجميله ولكنها ليست المنشوده.

هل تاخدنا دوامه احلامنا الي مالانهايه حتي اننا قد ننسي ماقد نسجنا خيالاتنا واحلامنا من اجله.

الرجل الثلاثيني

بزمتكم مش حلوه حكايت الرجل الثلاثيني ده حاجه كده زي الرجل الاخضر بالظبط ههههههههههه.
علي العموم انا سمعت انهم بيقولوا ان الثلاثين ده سن بلوغ قمه المسئوليه والنضوج عند الرجاله
وادينا وصلناله لما نشوف بقي هيحصل ايه. محدش يفهم من كلامي ان انا مش مسئول ولا ناضج بالعكس انا شايف ان انا وصلت لمرحله كبيره جدا في الموضوع ده. علشان كده مش متخيل يعني ان موضوع الثلاثين ده هيفرق معايا اوي في مسأله النضوج الفكري والمسئوليه والكلام الكبير ده. بس انا كدا كدا وصلتله لما نشوف هيحصل ايه الكلام الي سمعته ده صح ولا زي ما بيقولوا كلام في كلام يا عبد السلام.

تحيات الرجل الاخضر ياه قصدي الرجل الثلاثيني.

الثقه المفقوده

اخدت وقت كتير جدا علشان اقرر اول خاطره هتكلم عنها هيا ايه.

وفي اثناء التفكير ده كنت بتابع مدونات ناس كتير ولفت نظري ان تقريبا معظم التدوينات لشباب وبنات معظمهم في سن الزواج والكل في نفس المشكله البحث عن النصف الاخر.
وكل التدوينات تفيض مشاعر ورومانسيه واحاسيس مرهفه جارفه.


طيب فيه ايه بقي البنات موجودين والاولاد كمان موجودين والاخت الرومانسيه مليأ التدوينات ايه هيا المشكله غريبه مش كده.

روحت واخد نفسي واندمجت في التفكير في المشكله من زوايا عديده.

وبعد تفكير وسرد لوقائع معاصره لبعض الاصدقاء وشخصيه . لقيت ان كل الموضوع ينحصر في ازمه ثقه كبيره جدا بين الشباب والبنات.

تقلي يعني ايه ازمه ثقه اقول علي طول ان نتيجه رتم الحياه السريع الي احنا عايشينه ده تقريبا كده العلاقات الاسريه والعلاقات العامه بينا وبين اهالينا واصحابنا اصبحت شبه معدومه اللهم الا حالات ومناسبات محدوده جدا.

وده سبب وجود عدم تعارف او تقارب بين افراد العائله الواحده ونتج عنه انعدام الثقه بالطرف الاخر لانه لا توجد تجارب حياتيه مشتركه بين الطرفين.

يجي الولد لو فكر انه يتقدم للبنت يضرب اخماس في اسداس طيب هيا هتوافق من الاساس انها ترتبط بيا طيب ولو وافقت هل هيا فعلا ده البنت الي هقدر اكمل معاها مشوار حياتي طيب هيا هتحبني وياترا لو اتقدمتلها ووافقت وهيا حبتني وانا محبتهاش هقدر اسعدها . طيب لو كل ده حصل هنقدر نتلاقا فكريا. هيا طباعها في البيت عاملا ازاي.

البنت صراحه مش عارف اوي بيفكروا ازاي بس اكيد في نفس الاتجاه والتسأول هل هيسعدني هل هسعده لو حبيته هيحبني وده شي طبيعي اعتقد يعني.

طيب مهما لو اساسا فيه بينهم تعارف من الاول في نطاق الاسره وفي حدود العائله هيكون فيه احتكاك هيكون فيه فكره ولو عامه عن الطباع الشخصيه علي الاقل هيكون فيه ولو جزء بسيط من المشاعر الي ممكن يتنبي عليها شئ جميل. انما مافيش ده كله الشباب يعمل ايه لما يرتبطوا وبعدين يكتشفوا ان ما فيش شئ مشترك بينهم . اكيد انفصال باي شكل اوم ايه بقي الانفصال ده يزود نسبه الظاهره ده في البلد اوم ايه يزود مشكله عدم الثقه لانه احنا بنعتمد علي التجارب السابقه برده.

تلاقي الولاد والبنات داخلين في دور اكتئاب ده انا لو عديت كام مدونه ومدون هنا كاتبين موضوع عن حاله الاكتئاب الي بيمروا بيها هتتصدموا نسبه كبيره جدا والله علي مدار الاسابيع الي فاتت ده.

وايه تشوف البوست الي قبل بوست الاكتئاب تلاقي البوست الرومانسيه والمشاعر الفياضه تفيض من كل كلمه في البوست. معني كده ان من كتر تطلع الشباب – من الجنسين - للرومانسيه ممكن الموضوع ده يجيب نتيجه عكسيه – مطلوب رائ اطباء النفس بس يكونوا متجوزين الله يكرمكوا-

السؤال دلوقت ازاي نرجع الثقه بين الطرفين ؟؟
ازاي نخلي الولد يثق في مشاعره تجاه الطرف الاخر والعكس ؟؟
ازاي الولد لما يفكر في بنت دماغه متروحش لموضوع الخبرات السابقه الكتيره وتخليه يفقد الثقه في نفسه قبل ما يفقد الثقه في البنت والعكس ؟؟

تسأولات كتيره اعتقد ان احنا اساسا في ازمه ثقه مع نفسينا يطب ازاي وكيف العمل محنا لازم نحلها ولازم نحلها بنفسينا لانها مشكلتنا مش مشكله الجيل الي فات ده مشكلتنا ولازم نحلها مع بعض علشان نرجع نثق في بعض.

تحياتي للجميع

" خواطر الثلاثين "

خواطر

انا يا جماعه خلاص هيبقي عندي ثلاتين سنه قريب جدا متخيلين يعني ايه ثلاتين سنه. صديقه هنا صاحبه قهوه عملت هيصه وزمبليطه لما بقي عندها 21 سنه انا مش عارف هيحصلي ايه لما يجي اليوم الي يبقي فيعه عندي 30 سنه.

بصراحه كده مش هيا ده المشكله الرئيسيه بتاعتي السن يعني وكده انا الموضوع وما فيه ان انا هيكون عندي 30 سنه ولسا احمل لقب اعززززززززززب.

الموضوع ده يا جماعه ماثر فيا شويتين او تلاته علشان كده بعد طول غياب قررت ان يكون موضوع المدونه " خواطر الثلاثين "

يعني ايه هيا مشاعري علي اعتاب الثلاثين وفي خلال الثلاثين وبعد الثلاثين.

ونحاول نشوف حل لمشكله الاعزب وعنده 30 سنه ده . انا السبب ولا السبب فين. مهو لازم نشوف حل للموضوع ده.

اتصرفوا عندنا شهر واسبوع بس قبل ما اكمل الثلاثين ربيعا ان شاء الله.

الي من ادين لها بوجودي

مكنش ممكن امشي النهارده من غير ما اكتب الي اعز الحبايب
اللهم لك الحمد والشكر علي ما انعمت عليا به من كل نعمك التي لا تعد ولا تحصي ومن تلك النعم امي اغلي الحبايب نعمه من نعم الله عليا ونعمه حبيبه علي قلبي يا من ادين لكي بحياتي يا من لا ولن اقدر علي الوفاء بحقه يوم من الايام علي وانا الذي التحري رد الامانات والحقوق لاهلها لا ادري السبيل الي رد هذا الحق اللهم يا من اكرمتني بهذه السيده الفاضله المكافحه صاحبه الابناء الاربع انعم عليا بنعمه رد جزء من فضلها وحقها عليا اللهم استجب لدعواتها اللهم انعم عليها بالصحه والعافيه واعنها علي حسن طاعتك وعبادتك.
الي كل ابن وابنه الي كل عريس وعروسه بر وطاعه الوالدين واجب علي كل منا اللهم ارزقنا حلاوه البر والطاعه لوالدينا اللهم امين.

الفكره طقت في دماغي وانا في الشغل

الفكره كبرت في دماغي وانا قاعد بشتغل - مصيبه والله سايب الشغل وعمال العب ربنا يستر - قمت عامل بلوج انا كمان تسالني ليه كبرت في دماغك اقلك يا سيدي ليه
البنت الي اسمها برايد بتشردلنا ومحدش عارف يرد عليها قوم ايه قلت طيب ما زي ما هما مش عارفين يتجوزوا ما احنا كمان متنيلين علي عينا ومش عارفين نتجوز يعني من الاخر انتم السابقون ونحن الاحقون يا ست الدكتوره
يعني وممكن في ذات الوقت واحنا بنحكي علي الي بيحصل معانا كعرسان لقطه - ما تخدش في بالك - من تعنت الاباء والاخوات البرايدات برده نحاول نوصل لاصل المشكله ونتبادل الاراي ونقول ايه الدروس المستفاده من كل مقلب اصدي مقابله تعارف يعني
وهل الاخوه الشباب بتحب فكره زواج الصالونات ولا زواج الحب ولامور والكلام الكبير ده
المهم انا عايز الاخوه العرسان يولعوها ردود علشان نتوصل في الاخر لايه يا ولاد للدروس المستفاده علشان يعني نشوف احنا بنعمل ايه خطأ وعلشان نعرف برده البنات بيعملوا ايه غلط ونحاول نساعد بعض علي حل مشكله الصدمه الاولي - اول لقاء يعني -
وبعدين انا عماله تكبر في دماغي حتت فكره مش عارف بالظبط هتوصل لايه وهتشوف النور ولا لا بس الفكره ده لو تمت يا ولاد ويا بنات هتكون فكره لذيذه جدا وهتوفر علينا حجات كتيره جدا جدا قولوا يا رب تكمل الفكره بس لما نشوف الاول موضوع البلوج ده ايه حكايته وهيفرق معايا ومعاكم ولا لا لو كان هيفرق ان شاء الله نظبط الفكره سوا ونحاول نعملها بالاشتراك مع بعض علشان زي ما انتوا عارفين العمل الجماعي افضل من العمل الفردي

اشوفكم كمان شويه علشان عندي شغل كتير علي المكتب